Ժամանակը մարզասրահում ապարդյուն չանցկացնելու և երկարատև մարզումներից հետո արդյունք ունենալու համար համոզվեք, որ չեք անում հետևյալ 5 սխալը.
Ուժերն անխնա ծախսել
Հաճախ սկսնակ մարզիկները մարզասրահ հաճախելու առաջին օրերին սկսում են քրտնաջան աշխատել: Այդ ամենն արվում է բաղձալի արդյունքի հասնելու համար, սակայն ամենօրյա պարապմունքները, սննդի խիստ սահմանափակումները և անձնազոհությունը շատ շուտ հոգնեցնում են, հյուծում: Այս ամենն իրականում հանգեցնում է մոտիվացիայի կտրուկ անկման: Ոչ միայն մարզման անցնելու առաջին օրերին, այլ նաև մշտապես պետք է չափավոր և պլանավորված մարզվել: Կարևոր է մարզումների հաճախականությունը շաբաթական չգերազանցի` 3-4-ը: Պետք է չմոռանալ հավասարակշռված սնվելու և հանգստանալու մասին:
Կարծել, թե ձեզանից լավ մարզիչ չկա
Առանց մարզիչի պարապմունքը լավագույն դեպքում լինելու է քիչ արդյունավետ, իսկ վատագույն դեպքում կարող է ավարտվել տարբեր վնասվածքներով: Առնվազն 6 ամիս պետք է մարզվել մարզիչի հսկողության տակ, իսկ մշտապես պետք է հետևել ֆիթնես-հրահանգիչի դիտարկումներին:
Կարծել, թե մարզումներից հետո կարելի է ուտել ամեն ինչ, հատկապես, եթե մթերքները օգտակար են
Նիհարելու համար կա մի շատ պարզ կանոն՝ ծախսված կալորիաները պետք է գերակշռեն օրգանիզմ մուտք գործող կալորիաներին: Հետևաբար, եթե դուք նույնիսկ ձեր ամբողջ ժամանակը նվիրեք մարզումներին, միևնույն է չեք ունենա ցանկալի արդյունք, եթե չհետևեք սննդակարգի: Ընդ որում կարևոր է հիշել, որ սնունդը պետք է լինի բազմազան, բավարար, որպեսզի ուժերը բավարարեն և օրգանիզմը չhյուծվի: Պետք չէ միանգամից և խիստ կրճատել սնունդը, նմանատիպ սննդակարգերը բացասաբար են ազդում նյութափոխանակության վրա: Պետք է սնունդն աստիճանաբար նվազեցնել, ամսական պետք է պակասեցնել ընդունվող կալորիաների 20-30%-ը: Հակառակ դեպքում արդյունքի հասնել չի լինի: Լավ կլինի սննդակարգը որոշի դիետոլոգը:
Անտեսել նախավարժանքը
Առանց նախավարժանքի ուժային մարզումների անցնելը ծանրաբեռնում է մկանները, ջլերը, հոդերը: Հանկարծակի, կտրուկ շարժումները կամ մեծ ծանրությունները կարող են հանգեցնել գերձգումների, պատռվածքների և նույնիսկ կոտրվածքների: Մարզումից առաջ հարկավոր է առնվազն 5 — 10 րոպե այսպես ասած տաքացնել մկանները, ակտիվացնել հոդերը, սիրտն ու անոթները նախապատրաստել ծանրաբեռնման:
Անտեսել ուժային մարզումները և գերադասել միայն կարդիոպարապմունքները
Ուժային մարզումների ժամանակ ավելի քիչ կալորիաներ են ծախսվում, սակայն կա մի առանձնահատկություն, եթե կարդիո պարապմունքներից հետո կալորիաների ծախսման գործընթացը դադարում է, ապա ուժային մարզումների դեպքում այդ պրոցեսը շարունակվում է պարապմունքից հետո մինչև 36 ժամ:
