Պրոստատիտը շագանակագեղձի բորբոքումն է: Շագանակագեղձը շագանակի նման (որտեղից և ստացել է իր անունը) գեղձ է, որը գտնվում է տղամարդու միզուկի շուրջը: Այն կատարում է երկու կարևոր ֆունկցիա: Գեղձում առկա մկանային թելերի շնորհիվ կարգավորում է մեզի արտահոսքը՝ սեղմելով կամ թուլացնելով միզուկի սեղմանը (սֆինկտերը): Բուն գեղձային մասը արտադրում է հեղուկ, որը խառնվելով ամորձիներից եկող սպերմատազոիդների հետ հեղուկացնում է սերմը և խթանում սերմնաբջիջների ակտիվությունը: Շագանակագեղձում սինթեզվում են սեռական հորմոններ` տեստոստերոն, կենսաբանական ակտիվ նյութեր` պրոստագլանդիններ, այն էրեկցիայի ժամանակ միզապարկի փականի դեր է խաղում, իսկ զարգացած նյարդավորման շնորհիվ սեռական ակտի վերջում հաղորդում է օրգազմի զգացողություն:
Շագանակագեղձի բորբոքումը կարող է հանդիպել բոլոր տարիքի տղամարդկանց մոտ, սակայն ավելի հաճախ պրոստատիտ հանդիպում է մինչև 50 տարեկանների մոտ: Պրոստատիտի առաջացման պատճառները տարբեր են: Ըստ ընթացքի տարբերում են սուր և քրոնիակական պրոստատիտ :
Սուր բակտերիալ բորբոքման պատճառ են հանդիսանում մեզից դեպի շագանակագեղձ ներթափանցած բակտերիաները: Ժամանակին և ոչ ճիշտ բուժման հետևանքով սուր վիճակից պրոցեսը կարող է անցնել քրոնիկականի: Հաճախ շագանակագեղձի բորբոքման պատճառը մնում է անհայտ և հիվանդությունը ախտորոշվում է արդեն քրոնիկական բորբոքման փուլում:
Ախտանշանները
Ցավ կամ այրոցի զգացողություն միզելիս
Դժվարամիզություն, մեզը բաժին-բաժին է արտահոսում
Հաճախամիզություն և գիշերամիզություն
Անմիզապահություն
Պղտոր մեզ, արյան առկայություն մեզի մեջ
Որովայնի ստորին հատվածում դեպի մեջք ճառագող ցավի զգացում
Ցավեր շեքի շրջանում
Ցավեր առնանդամի և ամորձիների շրջանում
Ցավ սերմնաժայթքման ժամանակ
Բակտերիալ ինֆեկցիայի դեպքում հնարավոր են հարբուխանման երևույթներ
Փոքր կոնքի տրավմա (հեծանիվ քշելուց կամ ձիավարելուց)
Միզային կաթետրի օգտագործում, շագանակագեղձի բիոպսիայի իրականացում
ՄԻԱՎ/ՁԻԱՀ-ի առկայություն
Բարդություններ
Արյան վարակում (բակտերեմիա)
Մակամորձիների բորբոքում
Շագանակագեղձի աբսցեսի (թարախակույտ) առաջացում
Անպտղություն քրոնիկական պրոստատիտի դեպքում
Ի՞նչ անել տնային պայմաններում
Ընդունել տաք լոգանքներ, ինչը կմեղմացնի տհաճ ցավային զգացողությունները
Սահմանափակել կամ ընդհանրապես չօգտագործել ալկոհոլ
Խուսափել շագանակագեղձը ճնշող կենսակերպից՝ երկարատև նստակյաց վիճակ, հեծանիվ և այլն
Խմել մեծ քանակությամբ հեղուկներ (առանց կոֆեինի)
Պետք է հիշել, որ նմանատիպ գանգատների դեպքում անհապաղ, առաջին իսկ հնարավորության դեպքում պետք է դիմել բժշկին, մասնագիտացված օգնություն ստանալու և բարդություններից խուսափելու համար:
