Միոմա և հղիություն. տեսակները, բարդությունները, բուժումը:

միոմա

Միոման արգանդի մկանային հյուսվածքից առաջացող բարորակ գոյացություն է, որն այսպես ասած երբեք չի չարորականում, սակայն ժամանակի ընթացքում կարող է մեծանալ, չափերից կախված, որոշակի անհանգստություն պատճառել:

Միոման բավականին տարածված գոյացության ձև է և հաճախ կարող է առաջանալ կանանց ռեպրոդուկտիվ շրջանում (նույնիսկ երիտասար տարիքում): Այն կարող է առաջացնել տարբեր խնդիրներ, սկսած հարևան օրգաններին մեխանիակորեն ճնշելուց մինչև հղիության խոչընդոտում:

Տեղակայումից կախված, տարբերում են միոմատոզ հանգույցների հիմնական երեք տեսակներ.

  • ենթալորձային միոմա (աճում են դեպի արգանդի խոռոչ)
  • ներմկանային միոմա (աճում են մկանային շերտի հաստության մեջ)
  • ենթաշճային միոմա (աճում են դեպի արգանդի արտաքին մակերես)
Միոմա Mioma Миома

Ազդեցությունը հղիության վրա

Կանանց մեծամասնությունը սովորաբար հղիության ընթացքում խնդիրներ չի ունենում: Նահագների հեղինակավոր Եյլի համալսարանի մասնագետների կողմից 2010 թ-ի հրապարակած հոդվածի համաձայն, միոմատոզ հանգույնցերը հղիների մոտ կարող են մեծանալ մինչև 30% դեպքերում, հատկապես հղիության առաջին եռամսյակում: Հանգույցների մեծացման ամենատարածված բարդությունը ցավն է, հատկապես երբ գոյացությունը մեծ է լինում 5 սմ-ից: Ցավն ավելի արտահայտված է դառնում հղիության 2-րդ և 3-րդ եռամսյակներում:

Մյուս, ավելի վտանգավոր բարդություններից են.

  • Պտղի աճի դանդաղում – հատպաես դեպի արգանդի խոռոչ աճած հանգույցների դեպքում, երբ պտղի զարգացման համար տարածությունը փոքրանում է:
  • Ընկերքի շերտազատում – եթե հանգույցը մոտ է տեղակայված ընկերքի կպման տեղին: Սա կարող է ազդել պտղի սնուցման և թթվածնով ապահովման վրա:
  • Վաղաժամ ծննդաբերություն – հանգույցի չափերի մեծացումը, ինչպես նաև ցավը կարող են առաջացնել արգանդի կծկումներ և դրանով իսկ պայմանավորված վաղաժամ ծննդաբերություն:
  • Կեսարյան հատման անհրաժեշտություն – հետազոտությունները ցույց են տալիս, որ միոմայի առկայության դեպքում մոտ 6 անգամ մեծանում է ծննդաբերության համար կեսարյան հատման կիրառումը:
  • Պտղի ոչ նորմալ դիրք – պտղի դիրքի ոչ օրինաչափ դիրքավորում: Միոմայի ժամանակ արգանդի խոռոչը դեֆորմացվում է, ինչը կարող  խոչընդոտել պտղի նորմալ դիրքավորմանը:
  • Կրելախախտ – հետազոտությունները ցույց են տալիս, որ միոմայի առկայության դեպքում կրելախախտի, վիժման հավանականությունը կրկնակի մեծանում է:

Միոմայի ազդեցությունը պտղաբերության վրա

Միոմա ունեցող կանանց մեծ մասը կարող է բնական ճանապարհով հղիանալ` առանց բուժական միջամտությունների: Հատկանշական է, որ միոմայի տեղակայումից և աճի բնույթից կախված, այն կարող է ազդել հղիանալու վրա: Հատկապես մեծ է վտանգը միոմայի ենթալորձային տեղակայման դեպքում, երբ հանգույցի աճը ուղղված է դեպի արգանդի խոռոչ: Այս դեպքում կարող է ի հայտ գալ լուսանցքի դեֆորմացիա: Կարող են լինել վիժումներ և կրելախախտեր:

Միոմայի ախտանշանները.

  • ցավոտ և առատ արյունային դաշտան
  • արյունահոսություն դաշտանային ցիկլերի միջև
  • սակավարյունություն (անեմիա)՝ երկարատև, առատ արյունահոսություններով դաշտաններով պայմանավորված
  • սովորականից երկար դաշտանային ցիկլ
  • ցավ գոտկատեղի շրջանում
  • փորկապություն (հանգույցի կողմից արգանդի հետին մասում գտնվող հաստ աղու վերջնամասի ճնշման հետևանքով)
  • անպտղություն, կրելախախտեր, վիժումներ
  • հաճախակի միզարձակում (հանգույցի կողմից արգանդի առջևում գտնվող միզապարկի ճնշման հետևանքով)

Բուժման տարբերակները.

  • Միոմէկտոմիա – միոմային հանգույցի հեռացում: Վիրահատությունը պետք է անել հղիանալուց առնվազն 3 ամիս առաջ:
  • Հակաբեղմնավորիչ դեղորայք – այս դեղորայքի կիրառումը կանխում է հղիությունը, սակայն միաժամանակ կարող է նվազեցնել հանգույցով պայմանավորված ցավը և առատ արյունահոսությունը դաշտանի ժամանակ:
  • Միոլիզ – միջամտության հիմքում ընկած է տարբեր մեթոդներով միոման սնուցող անոթոների խցանումը, ինչը հանգեցնում է հանգույցի փոքրացմանը և որպես կանոն վերացմանը:
  • Հղիության ընթացքում – շատ հազվադեպ միջամտություն է, այն կատարվում է հղիության ընթացքում, բացառությամբ հղիության 2-րդ եռամսյակում: Այս դեպքում հնարավոր է հեռացնել միայն ենթաշճային և ներմկանային հանգույցները: